Hrekur Bónus litlu búðina úr hverfinu?

Í kvöld skrapp ég í búðina, til kaupmannsins á horninu. Það var ólga í loftinu, ég skynjaði hana um leið og ég kom inn. Það var nokkuð mannmargt í búðinni, fólk úr hverfinu mínu. Sumum var mikið niður fyrir. Það hefur nefnilega  frést að Bónus sé að flytja í næstu götu, í hús Iðnaðarmannafélagsins á Hallveigarstíg. Í búðinni frétti ég að Jói í Bónus hafi sést taka út húsnæðið, arkitekt Bónus hafi verið þar á ferð og að Bónus sé búið að segja upp húsnæðinu í Kjörgarði.  "Og hvað eigum við að gera? Geta íbúðarsamtökin ekki beitt sér? Hvað með aukna umferð og bílastæðavandræði?" Um þetta var rætt, já, fólkinu úr hverfinu var mikið niður fyrir.

Kaupmaðurinn á horninu hefur þjónað okkur dyggilega í öll þessi ár. Þar er opið frá 10-10/362, fólk er í reikning og það rabbar saman í búðinni, það rabbar við afgreiðslufólkið. Búðin okkar er litla félagsmiðstöðin í hverfinu. En getur hún lifað með Bónus í 2 mínútna fjarlægð? Ég vona það, ég mun halda áfram að versla þar og það munu margir aðrir gera. Við þurfum litlar búðir í hverfið okkar, búðir eins og kaupmanninn á horninu sem gefa lífinu í borginni lit, skapar fjölbreytileika í mannlífið. Ég fer stundum í Bónus, kaupi oft magnvörur þar, en megnið kaupum við hjá kaupmanninum á horninu.  Ég vona að okkur gefist áfram tækifæri til þess. Einn viðskiptavinurinn sagði eitthvað á þá leið að það væri næstum eins gott fyrir kaupmennina að hætta strax eins og að láta murka hægt úr sér lífið.

Athugasemdir

[Salvör Kristjana Gissurardóttir, 24.9.2008 kl. 05:50]

því miður hugsa ég að það sé ekki hægt að reka litla matvöruverslun við hliðina á Bónus. Það er ekki hægt að keppa við verð þar. Hér í hverfinu hjá mér á Teigunum lokaði matvöruverslunin á Gullteig fyrir nokkru, ég hugsa að það hafi verið samkeppnin við 10-11 verslunina í lágmúla sem er opin allan sólarhringinn sem hafi gert útslagið. Samt er 10-11 með hátt verð. Flestir verða að spara og það að versla í lágvöruverslunum eins og Bónus er liður í því.

[Bjarni Baukur, 24.9.2008 kl. 10:09]

Það togast á í grein Kristínar hér að ofan hagsýni og væntumþykja fyrir kaupmanninum á horninu. Hverfiskaupmaðurinn á allt gott skilið,- en sennilega mun Bónusverslun auka mikið við vöruúrval í hverfinu og svo er nú einu sinni Bónus,- með lægsta vöruverðið ! Það er stór hópur af öldruðum sem búa þarna og býst ég við að fyrir þá sé lágt vöruverð mikil búbót. Það er ókurteisi að segja: Einn viðskiptavinurinn sagði eitthvað á þá leið að það væri næstum eins gott fyrir kaupmennina að hætta strax eins og að láta murka hægt úr sér lífið.

Þetta er mikil rangfærsla á staðreyndum að segja: murka lífið úr kaupmanninum ! Ja svei Kristín, svona segir maður ekki !

[Kristín Dýrfjörð, 24.9.2008 kl. 11:14]

Það er ekki ókurteisi að segja að einhverjum finnist þetta.  Þetta er lýsing á upplifun, ekki staðreynd. En það er sjálfsagt rétt hjá þér að þegar að valið stendur um budduna og væntumþykjuna þá mun buddan ráð för. Sérstaklega þegar vöruverð fer hækkandi. Í Bretlandi las ég einhverstaðar að mikill samdráttur væri um þessar mundir í sölu á lífrænt ræktuðu, vegna þess að það er dýrara og fólk þarf að halda utan um budduna.  Hins vegar held ég að kaupmaðurinn minn á horninu sé ekkert sérstaklega dýr. Alla vega ekki nálægt því eins dýr og 10-11 sem er hér niður í bæ.  

[Egill (IP-tala skráð) 24.9.2008 kl. 12:46]

Þingholt er svo ofboðslega dýr búð að það er eiginlega ekki hægt að versla þar. Ég myndi fagna tilkomu Bónusverslunar. Myndi þýða að maður þyrfti ekki eilíflega að setjast upp í bíl til að afla nauðsynja.

[Kristín Dýrfjörð, 24.9.2008 kl. 13:10]

Ég held að það sé afstætt hvað er dýrt. Ég t.d. (og segir náttúrlega mest um mig) á það til að kaupa ýmislegt þegar ég fer í hinar ýmsu stórverslanir sem ég hef enga þörf fyrir. Hluti sem eiga jafnvel til að daga uppi í eldhússkápunum. Hins vegar kaup ég nákvæmlega það sem ég þarf, fer á tveimur jafnfljótum og það er opið fram eftir kvöldi þegar ég skrepp í Þingholt. þegar uppi er staðið er þetta þess vegna álíka fyrir mig. Vel að merkja við erum líka bara tvö í heimili, sjálfsagt hugsaði ég öðruvísi ef hér væri marga munna að metta.

[Kristín Dýrfjörð, 24.9.2008 kl. 13:56]

ps. þegar ég var lítill átti ég heima í Blesugrófinni, þar var kaupmaður í lítilli búð á A-götunni. Þegar ein fyrsta lágvöruverslun landsins Kaupgarður (fyrir þá sem ekki muna seldi hann í stórum einingum) opnaði á neðri hæðinni í Axis á Smiðjuveginum lagðist kaupmennska af í Blesugrófinni. Kaupgarður flutti seinna í stærra og betra húsnæði upp í Engihjalla, (minnir mig). En kaupmennska hefur aldrei náð fótfestu í Blesugrófinni eftir þetta. Ég held reyndar að það hafi verið margar ástæður þess að kaupmennska lagðist af í hverfinu, fleiri stórar verslanir nær hverfinu hafi bara verið hluti málsins. Það sama held ég að eigi við hér í Þingholtunum. Eins og ég sagði í upphafi þá er þetta líka spurning um fjölbreytileika sem ég held að við viljum flest hafa.   

[H.T. Bjarnason (IP-tala skráð) 24.9.2008 kl. 15:28]

Ég held að það bara um tvennt að velja í þessari stöðu.  Annars vegar að búa við ástand þar sem við höfum kaupmanninn á horninu.  Hann verður með persónulega þjónustu en að sama skapi hátt verðlag.  Hins vegar eitthvað í líkingu við Bónus þar sem þjónustan er sama og engin, en vöruverð tiltölulega lágt.  Sambýli þessara tveggja verslunartegunda gengur ekki.  Annað verður að víkja.

[Kristín Dýrfjörð, 24.9.2008 kl. 15:40]

Og vitum við þá ekki öll hvert stefnir?