Eitt hænufet á dag

Við höfum átt róleg og góð jól hér í Miðstrætinu, vorum 7 í mat á aðfangadag (Sturlubarnið meðtalið)og gekk það allt eins og það á að ganga. Opnuðum hurð út í garð og hlustuðum á kirkjuklukkur Dómkirkjunnar hringja inn jólin, á meðan suðan kom upp á súpunni. Hlustuðum á hátíðlega tónlist, snæddum, tókum upp pakka og röbbuðum saman. Sturlubarnið sem er að upplifa sín fyrstu jól fékk eintóma mjúka pakka, sennilega minnst 12 sett af fötum. Eina leikfangið kom frá langömmu Búddu, sætasti bangsinn sem fannst í bænum.

Silfrað jólatré (ekki besta mynd).

Við fengum bestu fáanlegu gjöfina, það er að eiga góð og ánægjuleg jól með fjölskyldunni. Sturla eldri er alltaf sterkt í huga okkar um jól, þá háði hann sitt dauðastríð. Jólin okkar eru alltaf bæði tími sársauka og gleði. Gleði yfir því sem við höfum og áttum, sorg yfir því að Sturla er ekki með okkur til að njóta. Sorg yfir að hafa ekki fengið tækifæri til að sjá hann þroskast og taka út sín fullorðinsár.

Bráðum kemur nýárið með hækkandi sól og nýjum vonum og væntingum. Um daginn skrifaði ég minningargrein um gamlan vin og skólabróður, hana hóf ég og lauk með ljóði Matthíasar Jochumssonar, en ljóðið var sungið við jarðaförina hans Sturlu. Þær pælingar sem þar koma fram um áhrif tímans á mannanna mein eru tímalausar og eiga kannski sjaldan eins vel við og þegar sól fer aftur að rísa á himni, eitt hænufet á dag.  

Hvað boðar nýárs blessuð sól?
Hún boðar náttúrunnar jól,
hún flytur líf og líknarráð,
hún ljómar heit af Drottins náð.

                                   

Sem Guðs son forðum gekk um kring,
hún gengur ársins fagra hring
og leggur smyrsl á lífsins sár
og læknar mein og þerrar tár

                                    (Matthías Jochumsson)

Athugasemdir

[Anna Ólafsdóttir (anno) (IP-tala skráð) 29.12.2007 kl. 14:20]

Takk elsku Kristín fyrir fallega færslu. Hugsaði til þín um jólin

En mikið svakalega er þetta spes tré - ég verð að segja að ég skil afskaplega vel að haldið sé í þá hefð að setja upp þetta tré. Það væri svo drastísk breyting að setja upp eitthvað "hefðbundið" og "venjulegt". Skilaðu kveðju til fólksins þíns og svo líka Guðrúnar Öldu og Sítu. Sakna ykkar allra

[Ingólfur Ásgeir Jóhannesson, 31.12.2007 kl. 16:22]

áramótakveðjur frá Akureyri