Viðtal við séra Sigfinn

Hlustaði á Sigfinn Þorleifsson sjúkrahúsprest á rás 1 áðan, hægt er að hlusta á þáttinn á vefnum. Hann var þar að ræða bók sem hann var að gefa út. Hlakka til að lesa hana. Af því sem mér heyrðist byggist hún á mannvirðingu, umburðarlyndi og kímni. Sigfinnur er einn þeirra presta sem oft settist hjá mér á sínum tíma. Prestur sem er svo mikil manneskja. Það er bæði gott að hlæja og gráta með honum. Hann jarðsetti bæði afa minn og ömmu enda alin upp á Eskifirði og leikbróðir móðurbræðra minna. Ömmu fannst ekki annar prestur koma til greina. Eftir andlát Sturlu hélt hann utan um minningarstund með unglingunum vinum hans og fjölskyldum. Seinast hittumst við í jarðaför í haust. Hún var falleg. 

Sigfinnur er einn þeirra presta sem gerir það að verkum að hófsamt fólk er enn í þjóðkirkjunni.  

Athugasemdir

[Helga Guðrún Eiríksdóttir, 6.12.2007 kl. 01:01]

Þekki hann persónulega, enda er hann kvæntur náfrænku minni. Yndislegur maður, traustur og mikill mannvinur. En hann heitir Sigfinnur, ekki Sigurfinnur.

Mbk

[Kristín Dýrfjörð, 6.12.2007 kl. 01:35]

Kærar, kærar þakkir, sýnir að maður á ekki að vaka allar nætur og reyna svo að koma frá sér skiljanlegum texta þess á milli. Þetta vissi ég vel, en skrifaði svo hitt, vill svo til að systir hans er líka æskuvinkona mömmu. **). Vona að mér fyrirgefist. Sat hér í nóttinni, fór yfir verkefni og hlustaði á Vítt og breitt á netinu. Fannst rétt að minnast á skynsemisrödd innan úr kirkjunni. Nóg er af hinu, því miður.

[Svanfríður Guðrún Gísladóttir (IP-tala skráð) 7.12.2007 kl. 21:23]

   Ég tek undir það sem skrifað hefur verið um hann séra Sigfinn,ég kynntist honum í gegn um vinnuna mína,fyrir nokkrum árum.Svo var Helga amma konu hans og Sigurbjörn afi minn systkin.