ævintýri í gönguferð - eða hversu ótrúlegar tilviljanir geta verið

Um hádegisbilið í dag segir Lilló við mig, “Kristín þú hefur val um tvennt, að halda áfram að vinna í garðinum eða skreppa með á Snæfellsnes”. En þar eru víst nokkur góð vötn sem hægt er að renna í. Mér fannst valið ekkert sérstaklega erfitt og valdi Snæfellsnesið enda fer garðurinn ekkert. Við keyrðum sem leið liggur upp að Baulárvallavatni. Þar útbjó Lilló stöngina og dreif sig út í vatnið á vaðstígvélum. Ég aftur ákvað að  líta aðeins til berja, blóma og fjallagrasa. Soldið fann ég af aðalbláberjum en ekki sá ég krækiber eða fjallagrös.  

Ég reika með meðfram vesturenda vatnsins, sá þar dálaglegan foss sem ég vildi skoða nánar. Þegar ég hafði gengið nokkra stund sé ég fólk koma á móti mér. Er það þá ekki sjálfur forseti Alþingis og frú á gönguför um vatnaleiðina. Við tókum upp spjall um berjasprettu og höldum svo hvort sína leið. Þau til norðurs og ég til suðurs. Innra með mér hló ég og hugsaði hvað örlögin geta stundum verið glettin. Að hitta einmitt ráðherra samgöngumála þegar flugslysið var. Ráðherra sem okkur fannst því miður ekki standa sig í því máli. Og það í upphafi sjálfrar verslunarmannahelgarinnar. Hinnar árlegu áminningar minnar um hvernig lífið getur leikið okkur.

  

Ætla svo að lokum að segja frá því að í vor hitti ég gamla skólasystur, mikla sjálfstæðiskonu af Snæfellsnesinu og hún sagði mér að viðkomandi hefði verið mjög góður ráðherra fyrir nesið. Eins og ég reyndar reyndi líka í dag á góðum vegum og fáum einbreiðum brúm.

Athugasemdir

[Þorsteinn Ingimarsson (IP-tala skráð) 5.8.2007 kl. 00:12]

Það er bara með það að fara á Snæfellsnesið að leiðin frá Borgarnesi að vegamótum er bara svo hrikalega löng og ekkert skemmtileg. 

[Kristín Dýrfjörð, 5.8.2007 kl. 01:12]

Þetta er ekkert mál, fá þér létta þyrlu sem svífur með þig yfir flóann út á nesið ægifagra. Er það ekki alveg örugglega á valdi hvers íslensks meðal-Jóns annars?

Ps. Gætir samt átt á hættu að nágrannarnir pirruðu sig á hávaðanum en hvað með það, lætur ekki svoleiðis smámuni standa í vegi þínum.